Os monumentos sevillanos: controlados dixitalmente e a distancia

Un equipo de investigadores da Universidade de Sevilla desenvolveu un sistema que permite controlar a distancia as condicións ambientais e os posibles danos que afectan os monumentos. De momento, probaron o sistema monitorizando durante cinco anos o 'Giraldillo' que coroa a Giralda. En declaracións do coordinador do proxecto e profesor da Escola Técnica Superior de Enxeñeiros da US, Mario Solís na páxina web do Servizo de Información e Noticias Científicas (SINC), este explica que o sistema se axustou ao 'Giraldillo' para rexistrar distintas variables asociadas á resposta mecánica desta escultura". Entre as variables observadas atópanse as accións e as condicións meteorolóxicas ás que se ve sometida a escultura e, segundo o experto, estas poderían "usarse para monitorizar outros monumentos históricos" e mesmo "en maquinaria e en compoñentes aeroespaciais". Os investigadores instalaron os sensores na escultura hai cinco anos aproveitando que entre 1999 e 2005 foi desmontada e restaurada. Dende aquela, devanditos sensores permitíronlles realizar un seguimento cuns resultados que se publicaron agora no último número da revista 'Structural Health Monitoring'. Os sensores están conectados a uns fíos que chegan a un mesmo terminal do que sae outro fío que vai ata o sistema de adquisición de datos, situado no Corpo do Reloxo da Giralda. Ademais, dende alí, mediante unha conexión a Internet ou de control remoto tradicional, pode enviarse a información ata calquera centro de control. As magnitudes que se rexistraron ao longo deste lustro de seguimento foron a velocidade e dirección do vento, o grao de flexión do vástago que sostén a estatua sobre a torre -para detectar desviacións-, e a medida de vibracións.